Будапешт-2024 ДАШТ өндөрлөлөө

2024 оны 12 сарын 10-15-ны өдрүүдэд Унгар улсын нийслэл Будапешт хотноо зохион байгуулагдах 25 метрийн  бассейны Дэлхийн аварга шалгаруулах тэмцээнд 194 орны 1000 орчим шилдэг тамирчид оролцлоо.

Тус тэмцээнд Монгол улсыг төлөөлөн ОУХМ Энх-Амгалангийн Ариунтамир-Араар даллах сэлэлтийн 100м, 200м зайд, ОУХМ Батбаярын Энхтамир- Өврөөр даллах сэлэлийн 100м, 200м-ийн зайд, СМ Батсаналын Марал-Өврөөр даллах сэлэлтийн 50м, 100м-ийн зайд, СМ Ганзоригтын Сугар- Мэлхий сэлэлтийн 50м, 100м зайд тус тус өрсөлдсөн юм.

Багийн тамирчдыг Шигшээ багийн Ахлах дасгалжуулагч Х.Батболд, дасгалжуулагч Ц. Баяраа, Э.Дэмүүл нар дасгалжуулан оролцлоо.

Мөн холбооны шүүгчдийн зөвлөлийн гишүүн Ц.Мөнгөнсор Дэлхий аварга шалгаруулах тэмцээний шүүлтийн үйл ажиллагаатай танилцаж, туршлага судлахаар багийн бүрэлдэхүүнд орон ажилласан бол MNB Спорт сувгийн редактор Ж.Батбаяр тэмцээний үйл ажиллагааг газар дээрээс нь сурвалжилан ажилласан юм.

2024 оны 25м бассейн Усанд сэлэлтийн дэлхийн аварга шалгаруулах тэмцээн өндөрлөж, олон онцлох амжилт, бахархам үйл явдлаар дүүрэн байлаа. Олон улсын шилдэг тамирчид хурд, хүч, ур чадвараа гайхуулан өрсөлдөж, 30 удаа Дэлхийн дээд амжилт шинэчлэгдэн тогтоогдсон нь энэ тэмцээний нэгэн онцлог боллоо.

Монголын баг тамирчдын хувьд өөрсдийн туршлага амжилтыг ахиулж ирээдүйн шинэ зорилгоо тодорхойлсон, дэлхийн усанд сэлэлтийн хөгжилтэй хөл нийлүүлэн алхах боломж бололцоог эрэлхийлсэн чухал арга хэмжээ болж өндөрлөлөө.

Их спортын үнэ цэнэ, урам зориг, эрч хүчийг хүмүүст хайрлаж байдаг тамирчиддаа өндөр амжилт хүсье. Тамирчны амжилт хямдхан олдоогүй.